Utuntu Duto Ingaruka nini

Yesu akiza umugore wari umaze imyaka cumi n’ibiri ari mu mugongo

²⁵ Nuko hariho umugore wari mu mugongo, wari ubimaranye imyaka cumi n’ibiri, ²⁶ ababazwa n’abavuzi cyane benshi bagerageza kumukiza, bamumarisha ibintu bye byose abitangamo ingemu, ariko ntibagira icyo bamumarira ahubwo arushaho kurwara. ²⁷ Yumvise ibya Yesu araza aca mu bantu, amuturuka inyuma akora ku mwenda we, ²⁸ kuko yari yibwiye ati “Ninkora imyenda ye gusa ndakira.” ²⁹ Uwo mwanya isoko y’amaraso irakama, amenya mu mubiri we yuko akize cya cyago. ³⁰ Yesu na we yiyumvamo ko ubushobozi bumugabanutsemo, ahindukira abyigana n’abantu arababaza ati “Ni nde ukoze umwenda wanjye?” ³¹ Abigishwa be baramusubiza bati “Ese ye, abantu barakubyiga nawe ukagira ngo ‘Ni nde unkozeho?’ ” ³² Abararanganyamo amaso agira ngo abone umukozeho. ³³ Uwo mugore aratinya, ahinda umushyitsi kuko azi ikimubayeho, araza amwikubita imbere amubwira iby’ukuri byose. ³⁴ Aramubwira ati “Mwana wanjye, kwizera kwawe kuragukijije, wigendere amahoro ukire rwose icyago cyawe.”

Mariko 5:25-34